ខេត្តស្វាយរៀង ៖ នាព្រឹកថ្ងៃទី៣០ ខែកក្កដា ឆ្នាំ២០១៦នេះ ឯកឧត្តម ម៉ែន វិបុលប្រធានគណៈកម្មាធិការគណបក្សប្រជាជនកម្ពុជាខេត្តស្វាយរៀង និងឯកឧត្ដម ចៅ ភិរិទ្ធ ប្រធានក្រុមការងារគណបក្សប្រជាជនកម្ពុជាចុះជួយឃុំឈើទាល បានអញ្ជើញជាគណៈអធិបតីក្នុងពិធីសំណេះសំណាលជាមួយមេគ្រួសារបក្ស និងប្រជាពលរដ្ឋ ចំនួន ៤ភូមិ គឺភូមិពោនកក ចេក តារាក់ និងភូមិសង្កែ ឃុំឈើទាល ស្រុកស្វាយជ្រំ ដែលមានវត្តមានចូលរួមសរុប ៤២៧នាក់ ដើម្បីស្វែងយល់ពីបញ្ហាប្រឈមនានាដែលជាកង្វល់របស់ប្រជាពលរដ្ឋផ្ទាល់នៅមូលដ្ឋាន ។ ជាមួយនឹងការដោះស្រាយបញ្ហាប្រឈម ដែលបងប្អូនប្រជាពលរដ្ឋបានលើកឡើង ឯកឧត្ដម ម៉ែន វិបុល ប្រធានគណបក្សខេត្ត បានឧបត្ថម្ភថវិកាមួយចំនួនដល់សមាជិក សមាជិកា ដែលចូលរួម ព្រមទាំងបានដោះសា្រយនូវសំណូមពរដែលបងប្អូនប្រជាពលរដ្ឋបានស្នើសុំ រួមមាន ៖
-ផ្ដល់លូទឹក ចំនួន ១៦កង់ ក្នុងនោះ លូមុខកាត់ ០,៥ម៉ែត្រ ចំនួន ៦កង់ និងលូ មុខកាត់ ០,៣ម៉ែត្រ ចំនួន ១០ កង់ ជូនប្រជាពលរដ្ឋនៅភូមិចេក
-ផ្ដល់កៅអីជ័រ ចំនួន ៥០ ជូនសាលាបឋមសិក្សាហ៊ុន សែន ឈើទាល
-ឧបត្ថម្ភស៊ីម៉ង់ត៍ ១០តោន សម្រាប់សាងសង់ឧបដ្ឋានសាលា នៅវត្តស្លា ស្ថិតនៅភូមិពោនកក ។ ជាមួយគ្នានេះ ឯកឧត្ដម ចៅ ភិរិទ្ធ ក៏បានជួយថវិកាសម្រាប់សង់បង្គន់អនាម័យ ចំនួន ១បន្ទប់ ជូនសាលាមត្តេយ្យសហគមន៍ឈើទាល ផងដែរ ៕
ព្រមជាមួយគ្នានេះផងដែរ ឯកឧត្តម បានផ្តាំផ្ញើឲ្យប្រជាពលរដ្ឋធ្វើអត្តសញ្ញាណប័ណ្ណគំរូថ្មីឲ្យបានគ្រប់ៗគ្នា ដើម្បីបានទៅចុះឈ្មោះ និងបោះឆ្នោតជូនគណបក្សប្រជាជនកម្ពុជាដើម្បីដឹកនាំប្រទេសជាតិនាពេលខាងមុខបន្តទៀត ហើយកុំឲ្យបងប្អូនប្រជាពលរដ្ឋលាបព័ណ៌ដាក់គ្នា និងមានសាមគ្គីគ្នាឲ្យបានល្អប្រសើរថែមទៀត ។
ក្រោយពីពិធីសំណេះសំណាលរួចមក ឯកឧត្តម និងក្រុមការងារបានអញ្ជើញចុះសួរសុខទុក្ខលោកតា ពុត សឿន ឪពុកធម៌សម្តេចតេជោ ហ៊ុន សែន នៅភូមិសង្កែ ឃុំឈើទាល ស្រុកស្វាយជ្រំ ព្រមទាំងឧបត្ថម្ភថវិកា ៥០០.០០០ រៀល និងសម្ភារៈមួយចំនួនទៀត
