តាមលទ្ធផល ដែលព្រះគោឧសភរាជ បរិភោគ ឃើញថា សណ្ដែក ៩៥ % ឯស្រូវ និងពោត បរិភោគ ៩០%។ តាមជំនឿ ព្រាហ្មណ៍ ទស្សន៍ទាយថា សណ្ដែក ស្រូវ និងពោត របស់ប្រជាកសិករ ក្នុងឆ្នាំនេះ នឹងទទួលបានទិន្នផលល្អ គាប់ប្រសើរជាមិនខាន។
ទោះយ៉ាងនេះក្ដី ពុំមែនមានន័យថា ដំណាំផ្សេងៗ នឹងពុំទទួលបានភោគផល នោះទេ ឬក៏មុខដំណាំដទៃទៀត ត្រូវបោះបង់ចោល មិនដុះក៏ទេដែរ។ សំខាន់ សូមបងប្អូន ព្យាយាមដាំដុះ ប្រកបដោយវិធីសាស្ត្រ កសិកម្មទំនើប ដែលមានក្រសួងកសិកម្ម សហការជាមួយអង្គការសង្គមនានា ដើម្បីផ្ដល់ពូជ និងបច្ចេកទេស ជូនដល់បងប្អូនប្រជាកសិករ។
ក្រៅពីការផ្សងតាមជំនឿ ដូនតាយើង រាជរដ្ឋាភិបាលក្ដី ក្នុងនាមគណបក្សប្រជាជនកម្ពុជាក្ដី នឹងបន្តឥតនឿយណាយ ក្នុងការអភិវឌ្ឍ បណ្ដាញធារាសាស្ត្រ ដែលជាប្រភពរក្សា និងបង្ហូរទឹកពីកន្លែងមួយ ទៅកន្លែងមួយ ឲ្យកាន់តែទូលំទូលាយ តាមផែនការ។
លើសពីនេះ រាជរដ្ឋាភិបាល ក៏ដូចជា គោលនយោបាយរបស់ គណបក្សប្រជាជនកម្ពុជា បាននឹងកំពុងរៀបចំយុទ្ធសាស្ត្រថ្មីៗ ដើម្បីលើកកម្ពស់តម្លៃ កសិផលក្នុងស្រុក របស់ប្រជាកសិករ ពិសេស ទំនាក់ទំនងជាមួយប្រទេសដទៃ ដើម្បីនាំចេញទៅកាន់ ទីផ្សារអន្តរជាតិ។
ជារួម ប្រជាកសិករ ក៏ប្រឹង គណបក្សប្រជាជនកម្ពុជា ក៏មិនព្រងើយ និង រាជរដ្ឋាភិបាល ក៏ខ្នះខ្នែងព្រមគ្នា ប្រកបដោយការយល់ចិត្តថ្លើមគ្នា នោះ កសិកម្មកម្ពុជា នឹងរឹងមាំរីកចំរើន ជីវភាពធូរធារ មានបាន ជាប្រាកដ។
សូមបញ្ជាក់ថា ព្រះរាជពិធីច្រត់ព្រះនង្គ័ល ធ្វើឡើងក្នុងគោលបំណង ផ្សងមើលប្រផ្នូលរបស់ស្រុកទេស ទៅតាមការបរិភោគរបស់ “គោឧសភរាជ”។ ម្យ៉ាងទៀត ក៏ជាការដាស់តឿន ក្រើនរំឭក ដល់ប្រជាជនខ្មែរយើង ដែលពឹងផ្អែកលើការធ្វើ កសិកម្មជាចម្បងនោះ ឱ្យបានដឹងថា រដូវវស្សាបានចូលមកដល់ហើយ។ សូមជូនពរ បងប្អូនប្រជាពលរដ្ឋ ជាពិសេសបងប្អូនកសិករ មានទឹកភ្លៀងប្រើប្រាស់ គ្រប់គ្រាន់ ក្នុងការប្រកបរបរកសិកម្ម និងបានទទួលផលល្អគ្រប់ៗគ្នា ទូទាំងប្រទេសកុំបីខាន៕
